બર્થ સર્ટિફિકેટ કેસ: સમાજવાદી પાર્ટીના નેતા આઝમ ખાન, પત્ની તન્ઝીન અને પુત્ર અબ્દુલ્લા ની સજા પર હાઈકોર્ટે રોક લગાવી, ત્રણેયને જામીન આપ્યા

(જી.એન.એસ) તા. ૨૪

લખનૌ,

ઉત્તર પ્રદેશ સાંજવાદી પાર્ટીના નેતા આઝમ ખાન, તેમની પત્ની તન્ઝીન અને પુત્ર અબ્દુલ્લાને બે જન્મ પ્રમાણપત્રના મામલે મોટી રાહત મળી છે. હાઈકોર્ટે ત્રણેયની સજા પર રોક લગાવી છે. આ સાથે ત્રણેયને જામીન પણ મળી ગયા છે. હાઈકોર્ટના ન્યાયાધીશ જસ્ટિસ સંજય કુમાર સિંહે આઝમ ખાન, તન્ઝીન અને અબ્દુલ્લા આઝમની ક્રિમિનલ રિવિઝન અરજી પર આ ચુકાદો આપ્યો છે. બંને પક્ષોની દલીલો સાંભળ્યા બાદ 14 મેના રોજ નિર્ણય સુરક્ષિત રાખવામાં આવ્યો હતો. જો કે ત્રણેય હાલ અલગ-અલગ જેલમાં બંધ છે.

સપા નેતા આઝમ ખાન, તેની પત્ની અને પુત્રને રામપુરની સાંસદ-ધારાસભ્ય વિશેષ અદાલતે જન્મ પ્રમાણપત્ર કેસમાં સાત વર્ષની જેલની સજા ફટકારી હતી. આને ક્રિમિનલ રિવિઝન પિટિશન દાખલ કરીને પડકારવામાં આવી હતી જેમાં સાથે જામીન માટે અરજી પણ કરવામાં આવી હતી.

કોર્ટે એડવોકેટ જનરલને પૂછ્યું હતું કે જ્યારે આ કેસમાં ગુનાહિત ષડયંત્રની કલમ 120બી ઉમેરવામાં આવી હતી, તો પછી આ કલમ હેઠળ પુરાવા કેમ એકત્રિત કરવામાં આવ્યાં નથી. કેસમાં આગોતરા તપાસના આદેશ કેમ આપવામાં આવ્યા ન હતા. કોર્ટે પૂછ્યું કે જન્મ પ્રમાણપત્ર આપનાર સંસ્થા મ્યુનિસિપલ કોર્પોરેશન સામે પગલાં કેમ લેવામાં આવ્યાં નથી. શું જન્મ પ્રમાણપત્ર એ મૂલ્યવાન દસ્તાવેજ છે? જવાબમાં કહેવામાં આવ્યું હતું કે આ જન્મ પ્રમાણપત્રના આધારે ઘણા મૂલ્યવાન દસ્તાવેજો તૈયાર કરવામાં આવ્યા હતા. એડવોકેટ જનરલે સરકારનો કેસ રજૂ કરવા કોર્ટ પાસે વધુ સમય માંગ્યો હતો. પરંતુ કોર્ટ આ માટે સહમત ન હતી. આઝમ ખાનના વકીલોએ તેમની દલીલો પૂર્ણ કરી લીધી હતી. કોર્ટે તમામ પક્ષકારોની દલીલો સાંભળ્યા બાદ નિર્ણય અનામત રાખ્યો હતો.

વિધાનસભા ચૂંટણી 2017માં, આઝમ ખાનના પુત્ર અબ્દુલ્લા આઝમ સ્વારથી સપાની ટિકિટ પર ચૂંટણી લડ્યા હતા અને જીત્યા બાદ ધારાસભ્ય તરીકે ચૂંટાયા હતા. તેમની સામે લડનારા નવાબ કાઝિમ અલી ખાન ઉર્ફે નાવેદ મિયાં અને બાદમાં ભાજપના નેતા આકાશ સક્સેનાએ નકલી જન્મ પ્રમાણપત્ર પર ચૂંટણી લડવાની ફરિયાદ કરી હતી. જેના પર હાઈકોર્ટે અબ્દુલ્લાની ચૂંટણી રદ્દ કરી દીધી હતી. સુપ્રીમ કોર્ટમાંથી પણ કોઈ રાહત મળી નથી. અબ્દુલ્લા આઝમના શૈક્ષણિક પ્રમાણપત્રમાં, તેમની જન્મ તારીખ 1 જાન્યુઆરી, 1993 નોંધવામાં આવી છે અને લખનૌ મ્યુનિસિપલ કોર્પોરેશન તરફથી જારી કરાયેલા પ્રમાણપત્રમાં, તે 30 સપ્ટેમ્બર, 1990 નોંધવામાં આવી છે. આઝમ ખાન સહિત ત્રણેય વિરુદ્ધ નકલી જન્મ પ્રમાણપત્ર તૈયાર કરવા બદલ કેસ નોંધવામાં આવ્યો હતો.