ઉત્તરાખંડના રૂદ્રપ્રયાગમાં શ્રદ્ધાળુઓને લઈ જઈ રહેલો ટેમ્પો ટ્રાવેલર અલકનંદા નદીમાં પડી જતાં 12 લોકોના કરુણ મોત

(જી.એન.એસ) તા. 15

દેહરાદુન,

ઉત્તરાખંડના રૂદ્રપ્રયાગમાં એક ગંભીર અકસ્માત થયો હતો જેમાં શ્રદ્ધાળુઓને લઈને જઈ રહેલી ટેમ્પો ટ્રાવેલર અલકનંદા નદીમાં પડી હતી. આ અકસ્માતમાં 12 લોકોના કરૂણ મોત થયા છે અને 8 લોકો ગંભીર રીતે ઇજાગ્રસ્ત થયા છે. આ દુર્ઘટના સમયે ટેમ્પો ટ્રાવેલરમાં લગભગ 23 લોકો હતા. આ વાહન નોઈડાથી મુસાફરો સાથે રવાના થયું હતું. તમામ મુસાફરો શ્રીનગર તરફથી બદ્રીનાથ હાઈવે પર જઈ રહ્યા હતા. આ દરમિયાન રૂદ્રપ્રયાગ પાસે આ વાહન અલકનંદા નદીમાં પડ્યું હતું.

આ અકસ્માતની માહિતી મળ્યા બાદ પોલીસ પ્રશાસનની બચાવ ટીમ અને એસડીઆરએફની ટીમ તાત્કાલિક ઘટનાસ્થળે પહોંચી ગઈ છે. લોકોને બહાર કાઢવા માટે સતત પ્રયાસો કરવામાં આવી રહ્યા છે. અકસ્માત એટલો ભયાનક હતો કે લોકોના મૃતદેહો અંદર ફસાઈ ગયા છે. ઘાયલોને હોસ્પિટલમાં લઈ જવામાં આવી રહ્યા છે. સીએમ પુષ્કર સિંહ ધામીએ પણ આ ભયાનક અકસ્માત પર શોક વ્યક્ત કર્યો છે. અકસ્માતમાં ગંભીર રીતે ઘાયલ થયેલા લોકોને લઈ જવા માટે એમ્બ્યુલન્સ તૈનાત છે. સીએમ ધામીએ ઘટનાની તપાસના આદેશ આપ્યા છે. અકસ્માત એટલો ગંભીર હતો કે ઘણા લોકો ટેમ્પોમાં ફસાયા હતા. રેસ્ક્યુ ટીમે તેને મુશ્કેલીથી બહાર કાઢ્યા હતા.

મુસાફરોથી ભરેલઈ ટેમ્પો ટ્રાવેલર ખાઈમાં પડી જતાં સ્થાનિક લોકોએ તાત્કાલિક પોલીસને જાણ કરી હતી, જે બાદ પોલીસ તાત્કાલિક ઘટનાસ્થળે પહોંચી હતી અને સ્થાનિક લોકો સાથે મળીને બચાવ કામગીરી શરૂ કરી હતી. પોલીસની સાથે એસડીઆરએફની ટીમ પણ અહીં પહોંચી ગઈ છે. ટ્રાવેલરની અંદરથી 8 લોકોને ઈજાગ્રસ્ત હાલતમાં બહાર કાઢવામાં આવ્યા છે અને તેમને સારવાર માટે લઈ જવામાં આવ્યા છે. મૃતકોની ઓળખ અને તેમના પરિવારજનોનો સંપર્ક કરવાના પ્રયાસો કરવામાં આવી રહ્યા છે.