મુકેશ અંબાણીની આગેવાની હેઠળની રિલાયન્સ ઇન્ડસ્ટ્રીઝ હવે ભારતના ઇતિહાસનો સૌથી મોટો IPO લાવવાની તૈયારીમાં છે. કંપની તેની ટેલિકોમ શાખા Jio Infocomm માંથી ફક્ત ૫% હિસ્સો વેચીને અંદાજીત રૂ.૫૨૦૦૦ કરોડ એટલે કે ૬ અબજ ડોલર જેટલો ફંડ ઉઘરાવવાનો પ્લાન બનાવી રહી છે. જો આ યોજનાને મંજૂરી મળશે, તો હ્યુન્ડાઈ મોટર ઈન્ડિયાના રૂ. ૨૮૦૦૦ કરોડના અત્યારસુધીના સૌથી મોટા IPOનો રેકોર્ડ તૂટી જશે.

આ માટે રિલાયન્સે ભારતીય મૂડી બજાર નિયામક SEBI સાથે અનૌપચારિક ચર્ચાઓ શરૂ કરી છે. હાલના નિયમ મુજબ, કોઈપણ કંપનીએ ઓછામાં ઓછો ૨૫% હિસ્સો જાહેર કરવા ફરજીયાત છે, પરંતુ રિલાયન્સ માને છે કે બજાર હાલ આટલી મોટી રકમ શોષી શકે તેવી સ્થિતિમાં નથી. તેથી કંપની SEBI સમક્ષ ખાસ છૂટછાટ માંગે છે, જેથી ઓછા હિસ્સાવાર પણ IPO લાવી શકાય.

આ IPO વિશ્વનાં મોટાં ટેક રોકાણકારો માટે એક્ઝિટનો રસ્તો બનાવી શકે છે. Meta અને Google જેવા પ્લેયર્સે ૨૦૨૦માં Jio Platformsમાં ૨૦ અબજ ડોલરથી વધુનું રોકાણ કર્યું હતું. આજે Jioનું મૂલ્ય ૧૦૦ અબજ ડોલરથી વધુ આંકવામાં આવે છે, છતાં રિલાયન્સ હજુ યૂઝર બેઝ અને રેવન્યુ વધારવા પર જોર આપી રહી છે.

અગાઉ રિપોર્ટ્સમાં જણાવાયું હતું કે કંપનીએ ૨૦૨૪ માટે IPO યોજનાઓ સ્થગિત કરી હતી, પણ હવે ફરીથી બજારની ગતિશીલતા પ્રમાણે ટાઈમલાઇન પર વિચાર કરી રહી છે. હવે સૌની નજર ઓગસ્ટમાં થનારી રિલાયન્સની વાર્ષિક સામાન્ય સભા (AGM) પર છે, જ્યાં Jioના IPO અને SEBIના નવા નિયમોને લઈને કોઈ મોટી જાહેરાત થઈ શકે છે.